18 დეკემბერი მიგრანტთა საერთაშორისო დღეა. მიგრანტთა უფლებების დასაცავად და მოწესრიგებული მიგრაციის მხარდასაჭერად IOM მსოფლიოს მასშტაბით აქტიურად მუშაობს.

COVID-19-ის პანდემიამ მნიშვნელოვანი ზეგავლენა მოახდინა ჩვენს ცხოვრებაზე. მან სერიოზულად შეზღუდა ჩვენი მობილობა სოციალურ-ეკონომიკური, კულტურული თუ სხვა ასპექტით. განსაკუთრებით დაზარალდნენ მიგრანტები და ის ადამიანები, რომლებიც ხშირად გადაადგილდებიან. მილიონობით მათგანი შემოსავლისა და თავშესაფრის გარეშე დარჩა. COVID-19-ით გამოწვეული გადაადგილების შეზღუდვის გამო კი მათ ვერ შეძლეს სახლებში დაბრუნება.

მიგრანტთა საერთაშორისო დღეს IOM საქართველოში ქსენოფობიასთან ბრძოლისა და მრავალფეროვნების შესახებ ცნობიერების ამაღლების მიზნით ღია ცის ქვეშ მოწყობილი „COVID-19 მიგრაციის სახეები“ გამოფენით აღნიშნავს. გამოფენა მოიცავს მიგრანტებისა და მათი ოჯახების ფოტოისტორიებს და ხაზს უსვამს მიგრაციის დადებით ასპექტებს. საქართველოში მყოფი უცხო ქვეყნის მოქალაქეების ისტორიები IOM-მა სამ ადგილობრივ არასამთავრობო ორგანიზაციასთან - „უფლებები საქართველო“, „მიგრაციის ცენტრი“ და „მწვანე კავკასია“ - თანამშრომლობით შეაგროვა. ამასთან, COVID-19-ის დროს სამშობლოში დაბრუნებისა და საკუთარი ისტორიების გაზიარების სურვილი გამოთქვეს იმ საქართველოს მოქალაქეებმა, რომლებიც ქვეყანაში IOM-ის დახმარებით დაბრუნდნენ და სარეინტეგრაციო დახმარებაც მიიღეს.  

გამოფენა 18 დეკემბერს ვაკის პარკის ზედა შესასვლელში მოეწყო და ფოტოებზე გამოსახული მიგრანტთა ისტორიების გაცნობის მსურველებს მისი დათვალიერება 2 კვირის განმავლობაში შეეძლებათ. აქტივობა ნორვეგიის საგარეო საქმეთა სამინისტროს მხარდაჭერით ხორციელდება. 

ფოტოების ავტორი: ერიკ გურლანი

მეტი ინფორმაციისათვის მიმართეთ:

ანა კაკუშაძე, პროგრამების ადგილობრივი ოფიცერი / მედია და კომუნიკაცია

akakushadze@iom.int 599 14 94 29