22 და 24 აგვისტოს მიგრაციის საერთაშორისო ორგანიზაციამ (IOM) ბათუმსა და თბილისში სახმელეთო გადაკვეთის პუნქტებისთვის გადამდებ დაავადებებზე რეაგირების გეგმისა და სტანდარტული ოპერაციული პროცედურის შესახებ ორი სემინარი ჩაატარა.

სემინარები საქართველოს შინაგან საქმეთა სამინისტროს (შსს) და საქართველოს შემოსავლების სამსახურის საშუალო დონის ხელმძღვანელებისათვის ჩატარდა და მიზნად ისახავდა კორონავირუსისა და სხვა გადამდებ დაავადებათა გავრცელების პრევენციისა და საზღვრებზე ჯანმრთელობისთვის უსაფრთხო გარემოს უზრუნველსაყოფად მათი უნარების გაზრდას.

შეხვედრებს დაავადებათა კონტროლისა და საზოგადოებრივი ჯანმრთელობის ეროვნული ცენტრიდან IOM-ის ადგილობრივი კონსულტანტი გაუძღვა, რომელსაც დახმარებას უწევდა შემოსავლების სამსახურის საბაჟო დეპარტამენტის სანიტარიული, ფიტოსანიტარიული და ვეტერინარული კონტროლის სამმართველოს ექსპერტი.

ღონისძიებას დაესწრნენ და მონაწილეებს მიმართეს შვეიცარიის კონფედერაციის ელჩის მოადგილემ - ურს ბეერმა, IOM-ის საზღვრის ინტეგრირებული მართვის პროგრამის ხელმძღვანელმა - მასიმო რამანზინმა, შემოსავლების სამსახურის საერთაშორისო ურთიერთობათა დეპარტამენტის უფროსის მოადგილემ დაჩი ქინქლაძემ და შინაგან საქმეთა სამინისტროს საერთაშორისო ურთიერთობების დეპარტამენტის წარმომადგენელმა ნიკოლოზ მინდიაშვილმა.

აღნიშნული აქტივობა მიგრაციის საერთაშორისო ორგანიზაციის (IOM) პროექტის - "საქართველოს მთავრობის მხარდაჭერა საზღვრის მართვის მიდგომების გასაძლიერებლად პანდემიის ადამიანების მობილობაზე ზეგავლენის შემცირების მიზნით" - ფარგლებში განხორციელდა და მისი დაფინანსება შვეიცარიის მიგრაციის სახელმწიფო სამდივნოს (SEM) მიერ მოხდა.