2021 წლის 22 მარტს IOM-მა მიგრაციისა და კულტურათშორისი კომუნიკაციის ახალი ნაწილის პრეზენტაცია გამართა, რომელიც მოწმისა და დაზარალებულის კოორდინატორის სამსახურის თანამშრომლების სახელმძღვანელოს დაემატება. მოწმისა და დაზარალებულის კოორდინატორის სამსახური საქართველოს შინაგან საქმეთა სამინისტროს  ადამიანთა უფლებების დაცვისა და გამოძიების ხარისხის მონიტორინგის დეპარტამენტში 2019 წელს შეიქმნა და მისი მთავარი ამოცანა სიძულვილის ნიშნით ჩადენილი დანაშაულის მოწმეებისა და დაზარალებულების დახმარება და მსგავსი ტიპის დანაშაულებების ეფექტური გამოძიებაა.

აღნიშნული ღონისძიება კულტურატშორისი კომუნიკაციის ტრენინგის გაგრძელებაა, რომელიც IOM-მა საქართველოს შინაგან საქმეთა სამინისტროს მოწმისა და დაზარალებულის კოორდინატორის სამსახურის თანამშრომლებისთვის 12-15 ოქტომბერს კაჭრეთში ჩაატარა. 2020 წლის ტრენინგს თბილისიდან, ბათუმიდან, ზუგდიდიდან, ოზურგეთიდან, ქუთაისიდან, ახალციხიდან, გორიდან და თელავიდან მოწვეული 16 კოორდინატორი დაესწრო, რომლებმაც მიიღეს ამომწურავი ინფორმაცია მიგრაციისა და იმ გამოწვევების შესახებ, რომელთა გადალახვა მიგრანტებს ხშირად უწევთ. ტრენინგმა ასევე მოიცვა ისეთი თემები, როგორიცაა დაუცველ მიგრანტებთან ეფექტური კომუნიკაციისთვის აუცილებელი ინსტრუმენტები, კონფლიქტის მართვა, სანდოობის გაზრდა და უფლებადამცველ ორგანოებთან თანამშრომლობა. აღნიშნულ საკითხებზე ცოდნის გასამყარებლად და სამსახურის მომავალი თანამშრომლებისთვის მისი მარტივად ხელმისაწვდომობის უზრუნველსაყოფად IOM-მა, შინაგან საქმეთა სამინისტროსთან თანამშრომლობით, კოორდინატორების სახელმძღვანელოსთვის მიგრაციის ნაწილი  განავითარა.

ტრენინგი, ისევე, როგორც სახელმძღვანელოში მიგრაციის ნაწილი, IOM-ის EMERGE პროექტის ფარგლებში, ნორვეგიის საგარეო საქმეთა სამინისტროს მხარდაჭერით, საერთაშორისო ექსპერტის, ბატონი კალინ რუსის მიერ და სახელმწიფო ექსპერტის - გიორგი ჩხეიძის დახმარებით შემუშავდა.