23 სექტემბერს განხორციელდა ჩარტერული რეისი ფრანკფურტი-თბილისის მიმართულებით. საქართველოს 60-მდე მოქალაქე დაბრუნდა IOM-ის ნებაყოფლობითი დაბრუნების პროგრამის (AVRR) ფარგლებში. ორგანიზებული დაბრუნება გერმანიისა და საქართველოს მთავრობების ინიციატივაა, რომელიც სრულად მხარდაჭერილია IOM-ის მიერ.

ბევრ ქვეყანაში პანდემია მიგრანტებს განსაკუთრებით შეეხო - უმრავლესობამ შემოსავლის წყარო დაკარგა, ახალი სამსახურის შოვნა კი უფრო გართულებულია, რაც მიგრანტებს დაბრუნებას აფიქრებინებს. ამასთან, კრიზისის დროს ბევრი მიგრანტი გეგმავს დაბრუნებას, რათა დრო საკუთარი ოჯახის წევრებთან გაატაროს. შესაბამის მთავრობებთან თანამშრომლობით IOM ხსენებულ მიგრანტთა დაბრუნების გზებს აქტიურად ეძებს, თუმცა არსებულ ბარიერებს ოფიციალური საბუთების მოსამზადებელი პერიოდის გახანგრძლივება დაემატა, რაც ვირუსთან ბრძოლის მიზნით მიღებული რეგულაციებითაა გამოწვეული.

ფრენასთან დაკავშირებული ხარჯები გერმანიის ნებაყოფლობითი დაბრუნების პროგრამამ (REAG/GARP) დაფარა.

დაბრუნებულთა ნაწილი სარეინტაგრაციო დახმარებას მიიღებს, რომელიც განკუთვნილია პირველადი საჭიროებების დაკმაყოფილებისა და მცირე შემოსავლის მომტანი საქმიანობის დაწყებისკენ.