მიგრაციის სახეები - ჰენილი, 20 წლის ინდოელი სტუდენტი ქუთაისში

ჰენილი 20 წლის ინდოელი სტუდენტია, რომელიც ქუთაისში 2019 წლიდან ცხოვრობს. საქართველოში ჩამოსვლა და „აკაკი წერეთლის სახემლწიფო უნივერსიტეტში“ სწავლა სხვა ინდოელი სტუდენტების რჩევების საფუძველზე გადაწყვიტა. 

„ელემენტარული ქართულის ცოდნის გარეშე ქუთაისში თავის დამკვიდრება შეუძლებელია.“ - ამბობს ჰენილი, რომლისთვისაც ქუთაისი მშვიდობიანი და ხელმისაწვდომი ქალაქია, სადაც მეგობრული, მზრუნველი და სტუმართმოყვარე ხალხი ცხოვრობს. ჰენილი და მისი მეგობრები სწავლას დიდ დროს უთმობენ და კვირა დღეს ერთად ატარებენ - მათ ძალიან უყვართ სადილის მომზადება, ფილმების ყურება და ერთად სადილობა. 

ჰენილი სამსახურს ეძებს, სადაც ნახევარ განაკვეთზე მუშაობას შეძლებს, რადგან მშობლების ფინანსურ მხარდაჭერაზე დამოკიდებულება არ სურს, მაგრამ მისი თქმით, ქუთაისში სამუშაო ადგილების დეფიციტია, განსაკუთრებით კი უცხო ქვეყნის მოქალაქეებისთვის. „აკაკი წერეთლის სახელმწიფო უნივერსიტეტში“ სწავლის პარალელურად, ჰენილი ქართულსაც სწავლობს და იმედოვნებს, რომ ენის ცოდნა ადგილობრივებთან კომუნიკაციას კიდევ უფრო გაუმარტივებს. ენობრივი ბარიერი ჰენილისთვის საწყის ეტაპზე ყველაზე დიდი დაბრკოლება იყო, რადგან ჩამოსვლამდე ფიქრობდა, რომ ადგილობრივთა უმეტესობა ინგლისურად საუბრობდა. 

ჰენილი ქუთაისში თავს კომფორტულად გრძნობს, მაგრამ რამდენიმე იდეა აქვს, თუ როგორ უნდა მიიზიდოს ქალაქმა მეტი უცხოელი და გახდეს უფრო საინტერესო. ჰენილის აზრით, ქუთაისში მრავალფეროვანი ბარების, რესტორნებისა და გასართობი დაწესებულებების გახსნით ქალაქი უფრო დინამიური გახდება. ჰენილი ვეგეტარიანელია და როგორც თავად ამბობს, ქუთაისში მისთვის არასაკმარისი არჩევანია - „მეტი დინამიური და მრავალფეროვანი გასართობი თუ რეკრეაციული სივრცე მეტ ახალგაზრდასა და ინგლისურის მცოდნე ადამიანს მოიზიდავს“, ამბობს ჰენილი. 
 

ფოტოების ავტორი ერიკ გურლანი