2023 წლის 22 თებერვალს მიგრაციის საერთაშორისო ორგანიზაციის (IOM), გაეროს მიგრაციის სააგენტოს, საქართველოს მისიის ხელმძღვანელმა - სანია ჩელებიჩ ლუკოვაცმა და ქალაქ თბილისის მუნიციპალიტეტის მერიის ტერიტორიული ორგანოს, სამგორის რაიონის გამგებელმა - კახა სამხარაძემ ხელი თანამშრომლობის მემორანდუმს მოაწერეს.

მემორანდუმი ითვალისწინებს მხარეებს შორის თანამშრომლობას ვარკეთილის მასივში, შერჩეულ ლოკაციაზე, ემიგრაციიდან დაბრუნებულ მიგრანტთა და დაბრუნების თემის მოსახლეობის საჭიროებებზე მორგებული სათემო პროექტის, „საყოფაცხოვრებო სერვის ცენტრის“ შექმნის და მისი ფუნქციონირების  ხელშეწყობაში.

საყოფაცხოვრებო სერვის ცენტრმა, ადგილობრივი მოსახლოებას ხელმისაწვდომი სერვისები უნდა შეუქმნას სარემონტო-სამშენებლო მიმართულებით: ელექტროობა, სანტექნიკა, კანალიზაცია, საყოფაცხოვრებო ტექნიკის რემონტი და სხვა.

სერვის ცენტრმა ადგილობრივი მოსახლეობის დამწყებ და დაუსაქმებელ ხელოსნებს სამეწარმეო და პროფესიული კომპეტენციების გაუმჯობესებისა და, პროფესიული საქმიანობისთვის საჭირო, სარემონტო-სამშენებლო ტექნიკასთან/ინვენტართან წვდომის შესაძლებლობება უნდა მისცეს.

საყოფაცხოვრებო სერვის ცენტრში მისულ ადგილობრივ მოსახლეს ასევე შეეძლება  სარემონტო-სამშენებლო ტექნიკის/ინვენტარის შეღავათიან ფასად დაქირავება, სხვადასხვა საყოფაცხოვრებო თუ სამეურნეო  საჭიროებებისათვის.

სათემო ინიციატივა ხორციელდება მიგრაციის საერთაშორისო ორგანიზაციის განვითარების ფონდის (IDF) მიერ დაფინანსებული პროექტის ფარგლებში - „მდგრადი რეინტეგრაცია და თემის გაძლიერება: პილოტური ინიციატივა მიგრანტთა დაბრუნების თემებში“.

ხელმომწერმა მხარეებმა, სამშობლოში დაბრუნებული მიგრანტების მდგრად რეინტეგრაციასა  და ამ პროცესში ადგილობრივი თვითმმართველობის მნიშვნელოვან როლზე და დაბრუნებულ მიგრანტთა რეინტეგრაციის სფეროში სამომავლო თანამშრომლობის გეგმებზეც ისაუბრეს.